Российысе медицина вузлашке тунемаш колташ ойпидышым ыштыме

Республикысе тазалыкаралтыш министерстве Российысе медицина вузлаште туныкташ 148 ойпидышым кылден. Марий Элысе абитуриент- влаклан целевой верым Кировысо медицина университет, Ижевскысе академий да Марий университет ойыреныт. Тӱшка налмаште тений 80 верым ойырымо. Эн шуко- 45 вер- «Эмлыме паша» специальность дене, «Педиатрийыш» 30 верым пуымо. Москосо Евдокимов лӱмеш стоматологий университет кум верым «Стоматологийыш», Кировысо медицина университет «Медицинский биохимий» специальностьыш кок верым пуэн. Тений Российысе вузлам 108 целевик тунем лектын, ординатура деч вара 38 врач Марий Элыш пӧртылшаш. Йошкар-Оласе медицина колледжым тений 285 еҥ тунем пытарен. Тушечын 238 еҥже бюджет верыште тунемын.