Республикыште кок министр вашталтын

Марий Элым вуйлатыше Александр Евстифеев вигак кок министрым должность деч утарыме шотышто Указым пеҥгыдемден. Тиде чоҥымаш, архитектура, илыме вер да коммунал озанлык министр Михаил Леонтьев ден транспорт да корно озанлык министр Александр Сальниковым. Михаил Леонтьев паша гыч шке кумылын каен. Таче кече гыч чоҥымаш, архитектура да ЖКХ министрын сомылжым жаплан шукташ Евгений Соколовым шогалтыме.
Республикым вуйлатыше Александр Евстифеевын Указше дене таче кече гыч Марий Элысе правительстве председательын икымше алмаштышыже должностьыш Александр Сальниковым пеҥгыдемдыме. Тымарте тудо транспорт да корно озанлык министр лийын да Правительстве председательын икымше алмаштышыжын сомылжым шуктен.  Указ- влакым кугыжаныш кучемын сайтыштыже савыктыме.