Республикысе чодыраште тул утларак пижаш тӱҥалын
Республикысе чодыраште тул утларак пижаш тӱҥалын. Теҥгечысе кече марте 20 чодыра пожарым палемдыме. Тушечын 18-ыже кугыжаныш чодыра фондышто, кокытшо «Марий чодыра» паркыште лийын. Чылаже 7 гектар наре чодыралан эҥгек ышталтын. Эн шуко пожар Звенигово районышто лийын- 7, Юриныште- 6. Кок гана волгенче рашкалтымылан кӧра тул пижын, молыжо айдемын шекланыде тул дене пайдаланымыжлан кӧра лийын. Тыгаяк жап дене таҥастарымаште ӱмаште 38 чодыра пожарым регистрироватлыме улмаш. Тунам тул 57 утла гектарым авалтен.