Республикым вуйлатыше Кугу Сеҥымашым пайремлаш ямдылалтме шотышто заседанийым эртарен

Республикым вуйлатыше Александр Евстифеев Кугу Сеҥымашын лӱмгечыжым пайремлаш ямдылалтме шотышто организационный комитетын заседанийжым эртарен. Эн ончыч тудо калыкын тазалыкше нерген ушештарен. Президент Владимир Путинын чыла министрлан грипп деч прививкым ышташ кӱштымыж деч вара, Евстифеев республикысе министр- влакланат тиде процедурым эрташ темлен. Мемнан черланаш правана уке, манын тудо. Сеҥымаш лӱмгечылан ямдылалтме йодышлан кугу тӱткыш ойыралтеш. Тӱҥ мероприятий- влакын кумда планыштым пеҥгыдемдыме. Тушко Россий да верласе кӱкшытан 182 мероприятийым пуртымо. Ветеран- влаклан социал, медицина полышым пуымо йодышым, тӱшка тӱвыра мероприятий- влакын программыштым каҥашыме. Республикыште диспансер эскерымаште ветеран радамыш пуртымо 98 процент еҥ шотлалтеш. Диспансер тергымаш дене Кугу Ачамланде сарын 89 процентшым авалтыме, 63 процентше мӧҥгыштак тергалтын. Сарын инвалидше 42 еҥ, Сарын участникше 153 еҥ уло. Нуным келгын тергыме. Заседанийыш погынышо- влак мемориалым сайын кучымо, шарнымашан верлам, салтак- влакым тойымо верым тӱзатыме йодышлам посна ончымо. «Российысе кычалме толкын» ушемын республикысе пӧлкажым вуйлатыше Дмитрий Шипунов Сурок посёлкышто чер деч колышо 555 салтакым тойымо вереш мемориалым шогалташ сӧрымӧ нерген йодышым луктын. Республикым вуйлатыше тиде пашам кызытак тӱналаш кӱштен, шошым ыштен огына шукто, каласен вуйлатыше. Тыгак туныктыш министрын алмаштышыже школ да туныктышо- влаклан грантым ышташ кӱштмӧ сомылым шуктымо, тӱвыра министрын алмаштышыже районласе эн сай усталык коллектив- влаклан конкурсым эртарыме нерген ойленыт. Александр Евстифеев студент да тунемше- влак деч посна миротворец да верласе сарлаште лийше- влакымат ушаш кӱлеш манын. Сеҥымаш кечым пайремлымаш сай кӱкшытыштӧ эртышаш да шуко еҥым, нунын шонымашыштым ушышаш,- иктешлен республикым вуйлатыше.