Президентын Посланийже Марий Эл правительствын шинчаончылныжо лиеш
Президентын Посланийже, тудым тӱрыс шуктымешке, Марий Эл правительствын шинчаончылныжо лийшаш. Тыгай задачым Республикым вуйлатыше Александр Евстифеев Посланийым иктешлыше совещанийыште правительствын еҥже- влаклан да министр- влак ончылно шынден. Эн ончыл задачылан демографий сӱретым саемдымашке да калыкым социал аралымашке виктаралтше мера- влакым ыштымаш шотлалтеш, - каласен республикым вуйлатыше. Республикысе социал вияҥмаш министр Ольга Фёдорова Марий Элыште тений гыч пуымо полыш нерген да Посланий дене келшышын могай у сомыл лийшаш нерген ойлен. Икымше январь гыч икымше йочам ыштыше ешлан парышышт эн изи окса кугытын кок размерже деч шагал гын, полыш пуалтеш. Тений тыгай полышым 7 тӱжемат 700 еҥ налеш. Министрын мутшо почеш, Посланий почеш полыш федерал законодательствыш вашталтышым пуртымеке пуалташ тӱналаеш. Тудо 3 гыч 7 ияш марте икшыван ешлан пуалтеш. Совещанийыште тыгак тӱҥалтыш класслаште тунемше- влакым шокшо кочкыш дене пукшымо нерген ойлымо. Туныктыш министр Наталья Адамован мутшо почеш, кызыт 1-ше гыч 4-ше класс марте 35 тӱжемат пеле йоча тунемеш. Нунын кокла гыч 9 тӱжемат 800 еҥже льготан улеш да оксам тӱлыде кочкеш. Посланий почеш мыланна эше 25 тӱжемат 600 утла йочам авалтыман, - каласен министр. Глава икымше сентябрь гыч мыняр окса кӱлеш лийшашым шотлаш кӱштен да кочкыш сай качестван лийшаш манын палемден. Тидын годымак пищеблокым тыгай нелытлан ямдылаш кӱлмым палемдыме. Ял озанлык министерстве дене верысе сатум налме шотышто кутырен келшыман. Посланийыште икымше медико-санитар полышым пуымо йодышымат тарватыме. Тазалыкаралтыш министр Марина Панькован мутшо почеш, тений 17 ФАП-ым чоҥаш палемдыме. Тидлан федерал бюджетыште 92 миллион, республикысе казнаште 12 миллион теҥгем палемдыме. Ямдылалтме паша тӱҥалын. Александр Евстифеев яллаште медицина кадрым ситарыме йодышымат тарватен. Тыгак Посланийыште палемдыме чыла задачым шукташ решенийым муаш кӱлеш манын каласен. Тиде тӱҥалтыш вашлиймаш гына, лишыл жапыште уэш тиде йодыш деке пӧртылаш сӧрен.