Мыняр пушеҥгым руэт, тунарымак уэш шынде

Россий Президентын кӱштымыж почеш 2024-ше ий марте мемнан кундемыште да элыште руымо чодыра олмеш 100 процент у пушеҥгым шындыман. Тиде кечылаште журналист- влаклан «Экологий» калыкле проектын «Чодырам аралымаш» регионысо проектше нерген каласкаленыт. Куяр посёлкышто чодыра пожарым йӧртышӧ у техникым ончыктеныт, пӱртӱс поянлык министервын пашаже нерген ойленыт. Силикатный посёлкышто ондак шындыме чодырам онченыт. Регионысо проект радамыште тенийлан палемдыме пашам тӱрыс шуктымо. Силикатный воктене самырык пӱнчӧ- влакым шындыме. Шукерте огыл нунын коклам сомылен лекме. Ик гектар кумдыкышто 10-15 тӱжем озымым вераҥдыме. Тушечын эн виянже 60 ий гыч кушкын шуэш. Айдеме лӱсан пушеҥгым ок шынде гын, утларакше лышташан пушеҥге кушкаш тӱналеш. А озанлыклан пӱнчӧ шукырак кӱлеш. Калыкле проект кышкарыште, мутлан, Марий Турек районышто гына 115 гектареш пушеҥгым шындыме. Ужар озымлан кычке шапашым сентябрь-октябрьыште шапашлаш тӱналыт.