Марий Элым вуйлатыше Александр Евстифеев Йошкар-Оласе «Юбилейный» спорткомплексым ончен лектын

Марий Элым вуйлатыше Александр Евстифеев Йошкар-Оласе «Юбилейный» спорткомплексын инженер системыжым да тӱҥ кышкаржым тергаш кӱштен. Тыгай решенийым тудо таче спорт комплексыш мийымеке, луктын каласен. Кодшо курымын 70-шо ийлаштыже чоҥымо калыкын йӧратыме спорт объектын тачысе кечылан 60 процентше гына кучылталтеш. Аварийный улмыжлан кӧра, бассейнжым петырыме, инженер системыжат кӱлеш семын ок ыште. Туге гынат, зданийын пел могыржо сайын кучалтеш. Кызыт тушто 500 наре еҥ тренировкыш коштеш. Спорт гимнастике, греко-рим кучедалмаш, корэш, акробат рок-н-ролл, мини-футбол, тазалыкым пеҥгыдемдыме мероприятий- влак эртаралтыт. Александр Евстифеев комплексым ончен лекмек, тудын сай, йӧнан верыште верланымыжым, но начар улмыжым палемден. Сандене тудым пужен ыштыме але рончен кудалтыме деч ончыч чыла кӱлешыжым шымлен лекман да эксперт заключенийым налман. Но тыште спорт сооруженияк лийшаш, манын тудо.