Марий Элым вуйлатыше тӱня мучко экспедицийыш мийыше-влак дене вашлийын
Марий Элым вуйлатыше «Тӱнян парусшо- влак» тӱня мучко экспедицийыш мийыше-влак дене вашлийын. Росрыболовствын кум лӱмлӧ парусникше- «Паллада», «Крузенштерн» да «Седов» Анатарктидым руш мореплаватель- влакын почмыштлан 200 ий темме да Кугу Сеҥымашлан 75 ий темме лӱмеш мланде шар йыр ийын эртат. Тиде экспедицийын икымше йыжыҥыштыже лийше Марий Элын участникше- влак мӧҥгыш пӧртылыныт. Экспедицийыште Козьмодемьянск оласе «Паллада» парус клуб гыч вуйлатышыже Андрей Желудкин ден кугурак юнга Роман Михеев миеныт да океанла гоч ийын эртеныт. Шке шонымашышт да кумылышт дене нуно республикым вуйлатыше Александр Евстифеевым палдареныт. Нуно икымше ноябрьыште Владивосток гыч «Паллада» судно дене тарваненыт да Самоа, Таити, Чили, Аргентина воктеч ийын эртеныт. Тиде кум тылзе да 25 кече жапыште пеленышт эре Марий Элын тистыже да чондайыште марий мланде гыч рок лийын. Портлаште Марий Эл нерген увер стендым вераҥдылыныт. Рок ден республикын тистыже кызытат суднышто улыт. Республикым вуйлатыше тыге манын: путешествий мучашлалтмек, тисте дене мом ыштеда- шке паледа, но республикысе тоштер- влак тудым налаш ямде улыт. Республике тендан дене кугешна. А Андрей Желудкин юнга Роман Михеевым мокталтен ойлен. Тудо лӱдде да чолган экспедицийын ужашыжым эртен. Тидыже илышыштыже кӱлешан лиеш манын. Ынде нуно школлаште лийыт, тунемше- влаклан вий-куат да уш-акыл тазалыкын кӱлешлыкше нерген каласкалаш тӱналыт. Нуно чынжымак мланде шар йыр савырненыт: пелыжым судно дене, пелыжым самолёт дене.