Марий Эл Правительствыште санитарно- противоэпидемический комиссий погынымашым эртарен
Марий Эл Правительствыште санитарно- противоэпидемический комиссийын заседанийже лийын. Тудым правительстве вуйлатышын алмаштышыже Илга Дравниеце эртарен. Тушто у коронавирусын лукмо черлан чаракым ыштыме мера- влакым, кылме черлан кӧра тӱшка мероприятийлам чарыме йодышым каҥашыме. Мутланымаште Роспотребнадзор виктемым вуйлатыше Светлана Булатова, тазалыкаралтыш министрын алмаштышыже Татьяна Бастракова лийыныт. Ситуацийын пӱсеммыжын икымше кечылаж гычак эпидемий сӱретым эскерымаш шукталтеш, ешартыш мера- влакым ыштыме, медицина пашаеҥ- влакын мом ыштышашыштым рашемдыме, медицина организаций- влакым ямдылыме, моло кӱлешан сомылымат виктарен колтымо. Тӱшка мероприятийлам чарыме йодышымат ончымо. Кодшо арнян кылме чер дене вич тӱжемат 940 еҥ черланен. Тидыже эпидемий кӱкшыт деч 45 процентлан шукырак. Грипп чер 21 еҥлан пижын. Чыла тиде сӱретым Роспотребнадзор виктем терген шога да умбакыжат эскера.