«Марий Эл- чолга еҥ- влакын верышт» лӱман форум эртен
Теҥгече калыкын тӱналтышыжлан полышым пуышо толкынын «Марий Эл- чолга еҥ- влакын верышт» лӱман кумшо форумжо эртен. Республикым вуйлатыше Александр Евстифеев погынышо- влакым саламлышыла, каласен: Российын кугыжаныш флагшын кечыже вашеш вашлиймаш символ шотан улеш. Тиде пайрем кажне ийын у кӱкшытыш нӧлталтеш. Верласе чолга еҥ- влакын пашашт нерген ойлымо годым, Кугу Ачамланде сарыште калыкын ыштыме подвигшым шарнымашеш кодаш темлымаш- влакын ешаралтмыштым палемден. Тиде темым тунемме ий тӱҥалтышын икымше да моло уроклаштыжат каҥашаш кӱлеш. Шушаш ийын икымше пелыштыже патриот шӱлышеш шуарыме, Сеҥымаш кече, чапкӱ, ветеран- влак нерген шонымашым ончыктымо шотышто эн сай районлан конкурсым увертарена,- каласен Евстифеев да ушештарен: Россий президентын Указше дене 2020-шо ийым Шарнымаш да Чап идалык семын увертарыме. Калыкын тӱҥалтышыже социал, экономик да тӱвыра полышым пуымо системым саемдаш, вуйлатыме пашам уэмдаш полшышаш. Тидымат каласен: тений республикыште калыкле проект- влакым шыҥдараш тӱналме. Тидыже лишыл ийлаште калыкын илышыжым саемдаш полшышаш. А тиде мероприятий калыкын тиде пашаш шке надыржым пышташ шонымыжым ончыкта. Ончычсо форумым эртарыме деч вара 9 тылзе утла жап эртен. Тиде пагытыште тудо палынак вияҥын. Тунам 100 еҥ форумыш погынен гын, тиде гана -300 еҥ. Нуно 139 проектым темленыт. Нунын кокла гыч эн сайжым республикым вуйлатышылан ончыктеныт. Икымше форумышто шуко пашаже самырык тукымым патриотизм шӱлышеш шуарымылан, социал сферылан полыш, йӧнан илыме кумдыкым ыштыме темылан лийын гын, кызыт физкультура да спорт, туризм, калыкле тӱвырам аралыме, пӱртӱс дене кылдалтше проект- влак ешаралтыныт. Форумыш чыла муниципал образований гыч 17 проектым кондымо, чылажат ойыртемалтше улыт. Нуно изи ял- влакым вияҥдаш полшат. Тыгак республикым вуйлатыше «Калыкын шарнымашыже» номинацийыште тауштымашан серыш- влакым кучыктен. Нуным шке проектыштлан Куженер район гыч Марина Горинова, Курык марий район гыч Леонид Иванов, Юрино гыч Наталья Иванова налыныт.