Кугыжаныш Погынын шымше сессийыштыже 16 йодышым ончымо
Таче Марий Эл Кугыжаныш Погынын шымше сессийже пашам ыштен. Тудын пашаштыже Республикым вуйлатыше Александр Евстифеев, Федераций Советыште Марий Элын представительже Сергей Мартынов, Кугыжаныш Думын депутатше Светлана Солнцева, тӱҥ федерал инспектор Павел Волков, правительствын еҥже, депутат, уполномоченный, да моло органын еҥышт лийыныт. Сессийын повесткышкыже 16 йодышым лукмо ыле. Ик эн ончыч депутат- влак «Ийготыш шудымо- шамычлан электрон сигаретым ужалымашым чарыме нерген» Законым приниматленыт. Тудын почеш, ужалкалыше- влаклан штрафын кугытшым палемдыме. Тыгак «2020-шо ийлан да ончыкылык кок ийлан республикын бюджетше нерген» законыш вашталтышым пуртымо. Тенийсе бюджетыш 680 миллион теҥге парыш пурышаш, роскотшо ик миллиардат 530 миллион лийшаш, тыге 850 миллион теҥге дефицитым пеҥгыдемдыме. Икмыняр законым федерал законодательстве дене тӧр кондымо. Федерал законышто лийше вашталтышлан кора республикысе южо законыш вашталтышым пуртымо. Шымше сессийыште республикын 8 законжым да Кугыжаныш Погынын 19 пунчалжым пеҥгыдемдыме.