Калыкле проект- влакым шыҥдарыме кышкарыште тенийсе икымше пелийыште 80 процент контрактым пеҥгыдемдыме
Республикыштына калыкле проект- влакым шыҥдарыме кышкарыште тенийсе икымше пелийыште 80 процент контрактым пеҥгыдемдыме. Тидын нерген Александр Евстифеевлан промышленность министр Станислав Крылов правительствын заседанийыштыже ойлен. Кодшо ийысе тыгаяк жап дене таҥастарымаште контрактым ыштымаш 25 процентлан ешаралтын. Тений тӱрлӧ источникым кучылтын, 9 миллиард утла теҥге оксам кучылташ палемдыме . Тидыже кодшо ийысе деч иктат пелылан шукырак. Регионысо проект- влакым шыҥдараш тӱналме годсек 827 тергымашым эртарыме, оксам йоҥылыш кучылтмо фактым рашемдыме огыл. Тидын годымак 8 калыкле проект почеш кугыжаныш да муниципал закупко дене 164 правонарушенийым рашемдыме. Республикым вуйлатыше контарктым ышташ ойырымо жапым шагалемдаш кӱлеш манын. Тидыже чоҥымо да пужен ыштыме пашам писынрак шукташ да кугытым ешараш йӧным пуа. Финанс министрын сомылжым шуктышо Наталья Ковинан мутшо почеш, тений калыкле проект- влакым шыҥдараш республикын бюджетыштыже 8 миллиард утла теҥгем палемдыме. Икмыняр проект почеш икымше пелийыште оксам 50 процент деч шагалрак кучылтмо. Тидыже федерал бюджет гыч тичмаш оксам налме шотышто лӱдыкшым луктеш. Александр Евстифеев ушештарен: республикыштына икмыняр объектым калыкле проектыш пуртымо огыл, но нуным чоҥымо да олмыктымо паша республикысе калыклан кӱлешан улыт. Нунын кокла гыч иктыже Шереметевын замокшо. Тидлан окса ойыралтеш. Вуйлатыше тыгак Келшымаш Пӧртым чоҥымо шотышто пашан кузе кайымыжым умылкален. Проектым ыштыме, экспертизым эртарыме, федерал целевой программыш пуртымо шотышто паша шукталтеш манын вашештыме.