Йочам эмлыме вер- влак у оборудованийым налыт

Йоча поликлинике- влакын материально- технический негызышт вияҥеш. «Йочан тазалыкшым аралымашым вияҥдыме программе» регионысо проектын цельже- 2024-ше ий марте аза колымашым тӱжем йочалан шотлымаште 3,9 луаш гана шагалемдымашке виктаралтын. Тенийсе пел ийыште тиде показатель 4,3 луаш лийын. Тений да шушаш ийын поликлиникылам оборудований дене пойдарен шукташ да йоча- влаклан тушто эмлалташ чыла йӧным ышташ палемдыме. Кок ий жапыште 134 миллион теҥгелан 86 медицина оборудованийым налман. Тенийлан 10 единицым налаш палемдыме. Август тӱҥалтышлан 9 оборудованийым кондаш контрактым ыштыме, 12 каналан кок электрокардиографым пашаш колтымо. Республикысе йоча клинический эмлыме верыште компьютер томографым вераҥдаш пӧлемым олмыктымо. Тыгак Йошкар-Оласе 5-ше йоча поликлиникыште, Волжск да Козьмодемьянск олаласе поликлиникылаште кӧргысӧ кумдыкым олмыкташ 7 миллион утла теҥгем ойырымо. Пашам 12-шо сентябрь марте мучашлышаш улыт.