Коронавирус Марий Элышкат толын шуын
Йошкар-Олаште коронавирус дене кок еҥын черланымыжым пеҥгыдемдыме. Иктыже оласе ӱдырамашын, весыже Моско гыч Марий Элыш Чебоксар поезд дене толшо ӱдырамашын. Когыньыштымат эмлыме верыш пыштыме. Пӧртылшӧ ик ӱдырамашыже Москосо ик аэропортышто пашам ыштен. Тудлан26 ий. Кокымшыжо- 38 ияш. Тудлан инфекций кушто пижме шотышто тергымаш кая. Марий Элым вуйлатыше Александр Евстифеев каласен: эпидемиологий йодыш контрольышто улеш. Специалист- влакын умылтарымышт почеш, ӱдырамаш- влакын тазалыкышт кызытеш лӱдыкшым ок лук. Нуно кок арня инфекций боксышто лийыт. Республикым вуйлатыше ешарен: кызыт нунын кӧ дене кылым кучымышт рашемдалтеш да рашемдыме еҥ- влакым медицина эскерымашке налыт. Республикыште кӱлеш вий ситышын уло. Александр Евстифеев тыгак каныш кечылаште кӧ мӧҥгыштӧ лийын, нунылан таум каласен. Республикыштына кызыт тӱжемат 117 еҥ медицина эскерымаште улеш. Учёт гыч 134 еҥым кораҥдыме. Тымарте Марий Эл Юл кундем округышто черым палемдыдыме ик регион гына ыле.