Корно правилым палет мо?
16-шо ноябрьыште республикысе калык Корно правилым палыме шотышто тотальный экзаменым кучен кертеш. Тидын нерген ГИБДД виктем увертара. Шинчымашым тергымаш ДТП-ште ӱмыр лугыч лийше- влакым шарныме Тӱнямбал кечылан пӧлеклалтеш. Ончылгоч шотлымо почеш, тушко Марий Элысе кок тӱжем наре еҥ ушнышаш. Нунын коклаште студент, автошколын курсантше, мер пашаеҥ, журналист да шинчымашыштым тергаш шонышо- влак лийыт. Экзаменым кучаш Йошкар-Олаште чылаже ныл площадке пашам ышташ тӱналеш. Тиде- Юлтехын икымше корпусшо, МОСИ, Дружба уремысе 94-ше пӧрт, Красноармейский уремысе 8-ше пӧрт. Республике мучко 24 вер лийшаш. Коло минут жапыште коло йодышлан вашмутым пуаш кӱлеш. Тергымаш чыла площадкыштыжат 12 шагатлан тӱналеш.