Юл серысе кок олам вияҥдыме нерген мутланыме
Марий Элым вуйлатыше республикысе правительствын еҥже- влак дене, Козьмодемьянскын мэрже Михаил Козлов да Волжск ола администрацийым вуйлатышын сомылжым шуктышо Алексей Веселов дене совещанийым эртарен. Тушто ола- влакым вияҥдыме, коммунал озанлык да инфраструктура нерген мутланыме. Козьмодемьянскын мэрже Россий минстройын ямдылыме пилот проектлан йодмашым ямдылыме нерген ойлен. Проектым кок йыжыҥлан ыштыме. Тений канализационно- насос станцийын оборудованийжым вашталташ, кум меҥге кужыт утла сетьым пужен ышташ палемдыме. Вес ийын, кокымшо йыжыҥыштыже, кокымшо подъем станцийын оборудованийжым, вӱдым налме кок скважиным вашалташ, 9 меҥгеат 400 метр сетьым пужен ышташ кӱлеш. Тидыже эше электроэнергийым аныклаш полшышаш, -каласен Козлов. Александр Евстифеев вес арнян Козьмодемьянскыш, Курык марий районыш мияш да йодышым келгынрак каҥашаш, эмлыме верым чоҥымаште паша кузерак мучашлалтмым тергаш сӧрен. Тыгак илыме верым чоҥаш мландым ойырымо йодышым тарватена манын. Волжск олан мэржын сомылжым шуктышо Алексей Веселов «Изи ола- влакым да историй шотан илем- влакым вияҥдымаш» Российысе конкурсыш ушнымо нерген ойлен. Тудын кышкарыште «Шуко функциян спорт сквер» проект шыҥдаралтшаш. Скверыште мотоспортлан трассе лийшаш. Тунемме да спорт комплекс чоҥалтшаш. Тушто вело- да мото спорт дене тунемме да практике занятий- влак эрташ тӱналыт. Скверым Машиностроитель микрорайонышто, куд гектар утла кумдыкышто чоҥаш палемдыме. Тушто тыгак баскетбол да волейбол площадке, канен коштмо вер да изи архитектур форма- влак лийшаш улыт. Российысе конкурсышто тиде проект сеҥышыш лектеш гын, тудым тений да вес ийын илышыш шыҥдараш тӱҥалыт.