Тошто пӧртла гыч калыкым кусарымаш- Правительствын ик эн кӱлешан пашаже,- каласен республикым вуйлатыше

Теҥгече Республикым вуйлатыше Александр Евстифеев олан мэрже Евгений Маслов дене пырля ола мучко коштын савырненыт да «Молодёжный», «Театральный», «Электрон» да «Машиностроитель» микрорайон- влакым вияҥдыме йодышым каҥашеныт. Кызыт оласе инфраструктурым вияҥдаш тӱрлӧ федерал да регионысо программе- влак полшат. Тенийсе ий гыч элна мучко «Илыме вер да оласе кумдык» калыкле проект шыҥдаралтеш. Тиддеч посна республикыште тошто пӧртла гыч калыкым кусарымаш чоҥымо кумдыкым вияҥдыме нерген ойпидыш кышкарыште шукталтеш. Тудын почеш чоҥышо организаций еҥ- влакым кусара, тошто пӧртым кораҥда да у илемым чоҥа. Но тиддеч ончыч пӧрт аварийный радамыш пурталтшаш. Александр Евстифеев ушештарен: тошто пӧртла гыч калыкым кусарыме сомылым умбакыжат шуяш кӱлеш. Ярсыше кундемлаште школым, йоча садым, моло оралтым да илыме пӧртлам чоҥаш кӱлеш. Яра вер уке. Сандене тошто пӧртлам кораҥден веле уым чоҥыман. Ме вич участкым ончен лекна, - каласен Александр Евстифеев. Нунын шотышто вашке иктешлымаш лиеш да конкурс увертаралтеш. Республикысе чоҥышо- влак вара пашам тӱҥал кертыт. Ушештарена: тиддеч ончыч республикысе илыме вер фондым вияҥдыме йодышым Россий Правительстве председательын алмаштышыже Виталий Муткон видеокыл йӧн дене эртарыме совещанийыште каҥашыме ыле. Тушто палемдыме: 2025-ше ий марте республикыште кум миллион квадрат метр илыме верым чоҥыман, 10 тӱжем утла квадрат метр аварийный илыме верым пытарыман да 724 еҥым у верыш кусарыман.