Александр Евстифеев Российын чоҥымаш, илыме вер да коммунал озанлык министрже Владимир Якушев дене вашлиймашым эртарен
Теҥгече Россий правительствым вуйлатышын республикыш толмо кышкарыште Александр Евстифеев Российын чоҥымаш, илыме вер да коммунал озанлык министрже Владимир Якушев дене вашлиймашым эртарен. Нуно «Илыме вер да оласе кумдык» проектым шыҥдарыме, илыме верым чоҥымашым вияҥдаш тудлан полышым пуымо нерген мутланеныт. Тиде калыкле проект ныл федерал проект гыч шога. Тенийлан палемдыме план чылаж денат шукталтшаш, почеш кодмаш уке. Шушаш ийын ыштышаш пашалан икымше ноябрь марте контракт- влакым пеҥгыдемден шуктыман. Тидыже вес ийлан полыш лиеш, - каласен Владимир Якушев. Александр Евстифеев министрлан республикылан полшен шогымыжлан тауштен. Каҥашыме эше ик тӱҥ йодыш Волжск оласе вӱд-пуч да канализаций озанлыкым уэмдымаш лийын. Тиде пашаште Республикым вуйлатыше полшаш йодын. Тиде пашалан ик миллиардат 200 миллион теҥге кӱлеш. Мом ышташ лиеш, ончалына да йӧным муаш тыршена,- каласен Владимир Якушев. Александр Евстифеев ден Владимир Якушев тыгак Россий министерствын курироватлыме йодыш- влакым радамын ончен лектыныт, индивидуальный программыш пуртымо объект- влакым каҥашеныт.